ប្រជាពលរដ្ឋតវ៉ាមុខតុលាការសាលាឧទ្ធរណ៍ក្រុងភ្នំពេញ ទាមទារយុត្តិធម៌ដោះលែងអ្នកស្រី ទេព វន្នី

ខណៈពេលនេះ សហគមន៍ដីធ្លីក្នុងក្រុងភ្នំពេញកំពុងតវ៉ាទាមទារឲ្យមានការដោះលែងអ្នកស្រី ទេព វន្នី និងទម្លាក់ចោលបទចោទប្រកាន់លើស្ត្រីបឹងកក់៣នាក់ នៅមុខតុលាសាលាឧទ្ធរណ៍ក្រុងភ្នំពេញ ព្រឹកថ្ងៃ១៥កុម្ភៈ២០១៧ ក្នុងពេលដែលតុលាការកំពុងសវនាការលើសំណុំរឿងប្តឹងជំទាស់លើការសម្រេចរបស់តុលាការដំបូងឲ្យស្ត្រី៣នាក់មានទោសជាប់គុក៦ខែ ។ ស្ត្រីសហគមន៍បឹងកក់៣នាក់ គឺអ្នកស្រី ទេព វន្នី អ្នកស្រី គង់ ចន្ថា អ្នកស្រី បូ ឆវី ត្រូវបានតុលាការសាលាដំបូងរាជធានីភ្នំពេញកាត់ក្តីកន្លងមកឲ្យជាប់ពន្ធនាគារ៦ខែ ពីបទចោទប្រកាន់ថា បានជេរប្រមាថមន្ត្រីរាជការសាធារណៈនិងបានប្រើអំពើហឹង្សាលើសមត្ថកិច្ច កងសន្តិសុខខណ្ឌឲ្យរងរបួសស្នាមជាដើម នៅមុខផ្ទះនាយករដ្ឋមន្ត្រី ហ៊ុន សែន កាលពីឆ្នាំ២០១១កន្លងទៅ ក្នុងខណៈពេលដែលប្រជាពលរដ្ឋសហគមន៍ដីធ្លីបឹងកក់ នាំគ្នាទៅដាក់ញត្តិជូនខុទ្ទការល័យនាយករដ្ឋមន្ត្រី ឲ្យជួយអន្តរាគមន៍ដោះស្រាយដីធ្លីបឹងកក់ដែលរងគ្រោះព្រោះការបណ្តេញចេញពីដីធ្លីលំនៅដ្ឋាន ។ នៅថ្ងៃកើតហេតុខាងលើ គឺអ្នកដែលប្រើអំពើហឹង្សា រំលោភសិទ្ធិមនុស្ស សិទ្ធិស្ត្រី សិទ្ធិកុមារ សិទ្ធិសេរីភាពការទាមទារតវ៉ា គឺជាសមត្ថកិច្ចអាជ្ញាធរក្រុងភ្នំពេញ ពិសេសគឺក្រុមកងសន្តិសុខនោះឯង ដែលបានហាមឃាត់ រុញច្រាន ប្រើអំពើហឹង្សាលើប្រជាពលរដ្ឋតវ៉ាទាមទារយុត្តិធម៌ដីធ្លីទាំងនោះបណ្តាលឲ្យរងរបួសហើយ បែជាតុលាការចោទប្រកាន់ចាប់ដាក់គុកថែមទៀត ចំណែកបក្សពួកអ្នកមានអំណាចកោងកាចបែជារួចខ្លួនទៅវិញ ។ បើតុលាការឯករាជ្យ យុត្តិធម៌ ! ត្រូវតែដោះលែងអ្នកស្រី ទេព វន្នី និងទម្លាក់ចោលបទចោទប្រកាន់លើស្ត្រីរងគ្រោះទាំង៣នាក់នោះភ្លាម ! "Non-Violence Overcome All Obstacles"