ស្តាប់បទវិភាគ : តើកម្ពុជាមានសិទ្ធិអាចយកទឹកដីកម្ពុជាក្រោមមកវិញបានដែរឬទេ ???
======VOD.5.6.2015======
ការបាត់បង់ទឹកដីកម្ពុជាក្រោមបានកន្លងផុតទៅ៦៦ឆ្នាំហើយ ប៉ុន្តែក្រុមអ្នកស្នេហាជាតិអះអាងថា ពួកគេមិនទាន់អស់សង្ឃឹមលើការទាមទារទឹករបស់ដូនតាខ្មែរមកវិញនោះទេ ។ មូលហេតុដែលពលរដ្ឋខ្មែរកម្ពុជាក្រោម ចេះតែព្យាយាមរើបម្រាស់ពីរបបគ្រប់គ្រងរបស់វៀតណាមនោះ ដោយពួកគេអះអាងថា អាជ្ញាធរកុម្មុយនីស្តមួយនេះ តែងតែបំបិតសិទ្ធិសេរីភាពខ្មែរម្ចាស់ស្រុករួមមាន ជំនឿសាសនា ការសិក្សាពីវប្បធម៌ អក្សរសាស្ត្រខ្មែរ និងសេរីភាពនៃការប្រកបរបរចិញ្ចឹមជីវិតជាដើម ។
ពលរដ្ឋខ្មែរកម្ពុជាក្រោមបានបញ្ជាក់ថា ស្ថានភាពរស់នៅរបស់ខ្មែរម្ចាស់ស្រុកនៅទឹកដីកម្ពុជា ខុសគ្នាស្រឡះពីការរស់នៅរបស់និគមជនវៀតណាម លើទឹកកម្ពុជាសព្វថ្ងៃដែលមានសេរីភាពពេញទីក្នុងការប្រកបរបររកស៊ី និងដើរហើរគ្រប់ទីកន្លែង ។ ចំណែកខ្មែរកម្ពុជាក្រោមវិញ មិនងាយស្រួលក្នុងការចេញចូលប្រទេសកម្ពុជានោះឡើយ ។
គណបក្សប្រឆាំង និងសកម្មជនខ្មែរកម្ពុជាអះអាងថា ពួកគេទូទាំងពិភពលោកតែងតែធ្វើការតស៊ូមតិទាមទារឲ្យវៀតណាមគោរពសិទ្ធិខ្មែរកម្ពុជាជាម្ចាស់ស្រុក ប៉ុន្តែរដ្ឋាភិបាលកម្ពុជាមិនដែលឃើញរំឭកពិធីបាត់បង់ទឹកដីខ្មែរដ៏ធំធេងនោះទេ ។
ក្រុមអ្នកវិភាគនិយាយថា បញ្ហានេះមកពីខ្មែរនៅមិនទាន់មានការឯកភាពគ្នាជាធ្លុងមួយ លើបញ្ហាទឹកដីខ្មែរកម្ពុជាក្រោម ។ តើកម្ពុជាអាចទាមទារទឹកដីកម្ពុជាក្រោមមកវិញបានទេ?
ក្រុមអ្នកជំនាញច្បាប់អន្តរជាតិ និងអ្នកជំនាញប្រវត្តិសាស្ត្រខ្មែរ បានអះអាងថា កម្ពុជានៅមានលទ្ធភាពគ្រប់គ្រាន់ក្នុងការប្តឹងទាមទារទឹកខ្មែរកម្ពុជាមកគ្រប់គ្រងវិញ ។
លោកបណ្ឌិត ហ៊ាង ឫទ្ធី ប្រធានគណៈកម្មាធិការពង្រឹងផ្នែកច្បាប់ ដើម្បីការពារសិទ្ធិមនុស្សនៅកម្ពុជា បញ្ជាក់ថា យោងតាមច្បាប់អន្តរជាតិ គឺកម្ពុជានៅមានពេល៣៤ឆ្នាំទៀត ដើម្បីប្តឹងទាមទារទឹកដីកម្ពុជាក្រោមមកវិញ ព្រោះអាជ្ញាយុកាលនៃការប្តឹងទាមទារមានរយៈពេល១០០ឆ្នាំ ។ ប៉ុន្តែលោកថាបញ្ហាត្រង់មេដឹកនាំកម្ពុជា បច្ចុប្បន្នគ្មានឆន្ទៈទាមទារទឹកកម្ពុជាក្រោមវិញនោះទេ។ លោកថា«បើសិនជាយើងខ្មែរ គ្រប់បក្ស គ្រប់ក្រុមដែលជាប់រដ្ឋាភិបាល ដូចរដ្ឋាភិបាលបច្ចុប្បន្ននេះគឺថាបើមានឆន្ទៈប្រទេសជាតិ យើងអាចប្តឹងទៅអង្គការសហប្រជាជាតិ សើរើឯកសារទាំងអស់ ឲ្យបារាំងទទួលខុសត្រូវ គឺថាទឹកដីកម្ពុជាក្រោម មិនមែនទឹកដីដែលយួនត្រូវតែយកបានជារឿងរហូត ជាប្រវត្តិសាស្ត្រនោះទេ បើសិនខ្មែរយើងមានសមត្ថភាព ថ្នាក់ដឹកនាំខ្មែរយើងធ្វើការសើរើ រួមគ្នាសើរើផ្អែកតាមឯកសារដែលខ្ញុំអធិប្បាយដោយសង្ខេបខ្លះៗតែប៉ុណ្ណោះ អំបាញ់មិញនេះ គឺយើងនឹងឈានទៅរកការយកទឹកដីកម្ពុជាក្រោមយើងបាន» ។
លោកបណ្ឌិត ហ៊ាង ឫទ្ធី បញ្ជាក់ទៀត កម្ពុជាមានភស្តុតាងគ្រប់គ្រាន់ដែលបញ្ជាក់ថា ទឹកដីកម្ពុជាក្រោមជារបស់ខ្មែរតាំងដូនតាមក គឺឯកសារនោះមានតម្កល់ទុកនៅប្រទេសបារាំង ។ លោកថា បារាំងជាអ្នកដាក់អាណានិគមលើកម្ពុជា បានចាញ់សង្គ្រាមជាមួយវៀតណាម ហើយដកទ័ពទៅវិញ ដោយមិនបានប្រគល់ទឹកកម្ពុជាក្រោមមកឲ្យកម្ពុជាគ្រប់គ្រងវិញឡើយ ទើបវៀតណាមបានលេសនេះយកកម្ពុជាក្រោមគ្រប់គ្រង ដោយគ្មានការយល់ព្រមពីអ្នកដឹកនាំខ្មែរសម័យនោះឡើយ ។
លោក ហ៊ាង ឫទ្ធី ឲ្យយោបល់ថា កម្ពុជាត្រូវធ្វើទំនាក់ទំនងការទូតជាមួយបារាំងលើបញ្ហានេះ នោះកម្ពុជាអាចទាមទារទឹកដីកម្ពុជាមកវិញបានហើយ ។ លោកថា«រឿងនេះបើសិនជាយើងមិនរើសើ បារាំងគេនឹងសំងំធ្វើមិនដឹងមិនឮ នេះជាអ្នកដឹកនាំប្រវត្តិសាស្ត្រមុនៗរបស់បារាំង ក៏ប៉ុន្តែប្រសិនបើយើងចេះសើរើទៅ យើងទំនាក់ទំនងទៅ យើងគិតថា កិច្ចសហការប្រតិបត្តិការអន្តរជាតិ ក្រសួងការបរទេស និងរដ្ឋាភិបាលយើងហ្នឹង គឺថាយើងអាចធ្វើបានហើយ ចំពោះការសើរើទឹកដីកម្ពុជាក្រោមយើង» ។
ប៉ុន្តែលោកនាយករដ្ឋមន្ត្រី ហ៊ុន សែន ក៏ធ្លាប់ថ្លែងថា លោកមិនគាំទ្រចំពោះការទាមទារទឹកដីកម្ពុជាមកវិញទេ ។ លោកថា«ខ្លះគេថា អូហ៍ ទៅយកកម្ពុជាក្រោមមកវិញ សូមអញ្ជើញទៅ មានពេលណាមួយខ្ញុំព្រះករុណា បើទៅយកខ្លួនឯងបាន ទៅយកទៅ ខ្ញុំករុណាខ្ញុំអត់មានលទ្ធភាពទេ ហើយគ្រាន់តែសុំជួយធ្វើក្តារមឈូម» ។
ទោះជាយ៉ាងនេះក្តី សាស្ត្រាចារ្យប្រវត្តិសាស្ត្រ លោក សំបូរ ម៉ាណ្ណារ៉ា បញ្ជាក់ថា តាមប្រវត្តិសាស្ត្រទឹកដីខ្មែរកម្ពុជាគឺជារបស់ខ្មែរ ដោយផ្អែកលើភស្តុតាងវត្តអារ៉ាម ប្រជាជនខ្មែរ អត្តសញ្ញាណខ្មែរ នៅមានរក្សាមកដល់សព្វថ្ងៃនេះ ។ ភ័ស្តុតាងទាំងអស់នេះហើយដែលលោកថាកម្ពុជាអាចទាមទារទឹកដីកម្ពុជាមកវិញនោះ ។ លោកថា «តើយើងសួរថាក្តីសង្ឃឹមរបស់យើងមានប៉ុនណា? ខ្ញុំសូមជម្រាបថា យើងមិនដែលអស់សង្ឃឹមនៅក្នុងកិច្ចការនេះទេ គឺយើងនៅតែមានសង្ឃឹមជានិច្ច» ។
បើតាមលោក សំបូរ ម៉ាណ្ណារ៉ា ទឹកកម្ពុជាក្រោមបានបាត់បង់បន្តិចម្តងៗ តាំងពីរជ្ជកាលស្តេច ជ័យជេដ្ឋាទី២ ប៉ុន្តែកម្ពុជាក្រោមបានបាត់ទាំងស្រុងនៅឆ្នាំ១៩៤៩ ដែលរដ្ឋកាលបារាំងសេស ជាអ្នកសម្រេចដោយឯកតោភាគីប្រគល់ទឹកដីខ្មែរឲ្យវៀតណាមគ្រប់គ្រង ។
យ៉ាងនេះក្តី លោកថាបើខ្មែរឯកភាពលើជំហទាមទារទឹកដីកម្ពុជាក្រោមមកវិញ ហើយអន្តរជាតិគាំទ្រនោះ នឹងបានជោគជ័យ ។ លោកបន្ថែមថា«គឺការព្រមព្រៀងទទួលយកជាមួយគ្នាសិន ឥឡូវច្បាប់ជាតិរបស់យើងមានការព្រមព្រៀងទទួលយកថា រឿងនេះធំសម្រាប់ការដោះស្រាយហើយឬនៅ ហើយច្បាប់អន្តរជាតិ តើគេយកចិត្តទុកដាក់ពីយើងទេ យកចិត្តទុកដាក់ពីជនជាតិភាគតិចតាមសន្ធិសញ្ញា និងការព្រមព្រៀងនៃសន្ធិសញ្ញាមុនឆ្នាំ១៩៤៩ ដូចគ្នាដែរឬទេ ។ ទាំងអស់នេះ គឺជារឿងមួយដែលយើងត្រូវឆ្កឹះឲ្យចេញនូវច្បាប់អន្តរជាតិដែរ មិនមែនតែច្បាប់ជាតិមួយមុខទេ» ។
យោងតាមឯសាររបស់សម្តេចឪ កាលពីថ្ងៃទី១៦ខែតុលាឆ្នាំ ២០០៥ ព្រះអង្គបានបញ្ជាក់ថា «នរោត្តម សីហនុ មិនដែលទទួលស្គាល់ថា ស្របច្បាប់ និងសមហេតុផល អំពីកម្ពុជាក្រោម-កោះត្រល់ បានទៅបារាំង-វៀតណាមនោះទេ» ។ឯកសាររបស់សហគមន៍ខ្មែរកម្ពុជាក្រោមឲ្យដឹងថា កម្ពុជាក្រោមជាទឹកដី ដែលមានវ័យចំណាស់ជាងគេបង្អស់ នៅក្នុងភូមិភាគអាស៊ីអាគ្នេយ៍ ។ ប្រជាពលរដ្ឋខ្មែរបានចាប់ឆ្ការព្រៃទន្ទ្រានកាន់កាប់តាំងលំនៅ នៅលើទឹកដីនេះមុនគេបង្អស់ ។ ឯកសាររបស់សហគមន៍ខ្មែរកម្ពុជាក្រោមបន្តថា កាលដើមឡើយ ទឹកដីកម្ពុជាក្រោមជាកម្មសិទ្ធិស្របច្បាប់របស់កម្ពុជា ត្រូវបានគ្រប់គ្រងដោយព្រះរាជាខ្មែរគ្រប់ជំនាន់ ប៉ុន្តែនៅឆ្នាំ១៨៥៥ ពេលអាណានិគមនិយមបារាំង បានចូលមកដល់កម្ពុជាក្រោម យកទឹកដីនេះដាក់ក្រោមការត្រួតត្រារបស់ខ្លួនជារៀងរហូតមក ។ លុះដល់ឆ្នាំ១៩៤៩ អាណានិគមនិយមបារាំង ក៏បានធ្វើច្បាប់លេខ ៤៩-៧៣៣ អនុម័តដោយសភាបារាំង ចុះថ្ងៃទី០៤ ខែមិថុនា ឆ្នាំ១៩៤៩ កាត់ទឹកដីខ្មែរកម្ពុជាក្រោម ដែលមានទំហំ ៦៨៩៦៥គីឡូម៉ែត្រការ៉េ ប្រគល់ទៅឲ្យអាជ្ញាធរវៀតណាម ធ្វើអាណានិគមបន្តរហូតដល់សព្វថ្ងៃ ដោយពុំបានសួរមតិប្រជាពលរដ្ឋខ្មែរជាម្ចាស់ ឬថ្នាក់ដឹកនាំនៃប្រទេសកម្ពុជាសម័យនោះឡើយ ៕
http://vodhotnews.com/29994
Buddhism for Social and Nation ( Peace,Freedom,Human Rights,Social Justice )
No comments:
Post a Comment