*******************VOD
លោកនាយករដ្ឋមន្រ្តី ហ៊ុន សែន កាលពីថ្ងៃពុធ បានព្រមានប្រើច្បាប់បោះឆ្នោតចាស់ ប្រសិនបើការចរចាកំណែទម្រង់លើការបោះឆ្នោតជាប់គាំង ដោយលោកបានស្នើដាក់ចំណុចមួយក្នុងច្បាប់ដែលចែងពីការបោះបង់អាសនៈ ប្រសិនបើតំណាងរាស្រ្តមិនចូលប្រជុំតាមការកោះអញ្ជើញរបស់ព្រះមហាក្សត្រ។
លោកនាយករដ្ឋមន្រ្តីបានថ្លែងបែបនេះនៅក្នុងពិធីបិទសន្និបាតស្តីពីលទ្ធផលការងារឆ្នាំ២០១៤ និងទិសដៅការងារឆ្នាំ២០១៥ របស់ក្រសួងមហាផ្ទៃ កាលពីល្ងាចថ្ងៃទី២៣ ខែកុម្ភៈ ឆ្នាំ២០១៥ នៅទីស្តីការក្រសួង។
លោកនាយករដ្ឋមន្រ្តី ហ៊ុន សែន បានថ្លែងណែនាំឲ្យលោក ស ខេង ប្រធានក្រុមការងារគណបក្សប្រជាជនកម្ពុជា ឲ្យដាក់បញ្ចូលចំណុចថាប្រសិនអ្នកតំណាងរាស្ត្រណាមិនចូលសភាតាមការកោះអញ្ជើញរបស់ព្រះមហាក្សត្រ ចាត់ទុកថាអ្នកតំណាងរាស្ត្រនោះ បានបោះបង់អាសនៈរបស់ខ្លួនចោល។ លោកបន្តថាគណៈកម្មាធិការជាតិរៀបចំការបោះឆ្នោត(គជប) ត្រូវជ្រើសរើសអ្នកតំណាងរាស្ត្រដែលមានសំឡេងឆ្នោតរបស់គណបក្សនយោបាយផ្សេងទៀតមកដាក់ជំនួសវិញ នៅពេលគណបក្សនយោយបាយមិនចូលរួមប្រជុំសភាក្រោយការបោះឆ្នោត។
លោក ហ៊ុន សែន ក៏បានព្រមានប្រើច្បាប់បោះឆ្នោតចាស់ ប្រសិនបើការចរចាជាប់គាំង។ លោកមានប្រសាសន៍ថា«ព្រោះចេះវាអត់មានពេលញ៉េមញ៉ុមណាទៀតទេ ហើយបើថាមិនអញ្ចឹងទេ ប្រើច្បាប់ចាស់ដដែល។ អាហ្នឹងខ្ញុំនិយាយមែនទែន។ ហើយថាកែទម្រង់ស៊ីជម្រៅហ្នឹង រាប់ទាំងកែទម្រង់បើអ្នកឯងមិនចូលរួមស្បថ មិនចូលរួមប្រជុំតាមការកោះអញ្ជើញទេ របស់ព្រះមហាក្សត្រ ចាត់ទុកអ្នកឯងបោះបង់អាសនៈក្នុងសភា អាហ្នឹងក៏កែទម្រង់ ដើម្បីកុំឲ្យវាមានរឿង»។
ចំណុចមួយចំនួនដែលគណបក្សទាំងពីរមិនទាន់ឯកភាពគ្នា
ចំណុច ដែលមិនទាន់ឯកភាពគ្នានោះមានដូចជាមាត្រា៦ថ្មីនៃជំពូកទី ២ចែងអំពីការកំណត់អាសនៈរដ្ឋសភា សកម្មភាពនៃការឃោសនាបោះឆ្នោត រយៈពេលនៃយុទ្ធនាការឃោសនាដែលគណបក្សប្រជាជនកម្ពុជាត្រូវការ២១ថ្ងៃ តែគណបក្សសង្រ្គោះជាតិចង់បាន២៥ថ្ងៃ។ ចំណុចផ្សេងៗទៀតរួមមានប្រព័ន្ធផ្សព្វផ្សាយព័ត៌មានអប់រំអ្នកបោះឆ្នោត របស់រដ្ឋ ដោយគណបក្សប្រជាជនចង់រក្សាខឹ្លមសារដដែល តែសង្រ្គោះជាតិស្នើកែសម្រួលតម្រូវឲ្យប្រព័ន្ធផ្សព្វផ្សាយ ព័ត៌មានរបស់រដ្ឋចុះផ្សាយគ្រប់ព័ត៌មានតាមការកំណត់ម៉ោង និងពេលវេលា ដែលស្នើដោយគណៈកម្មាធិការជាតិរៀបចំការបោះឆ្នោត(គជប)។
កំណត់ហេតុឲ្យដឹងទៀតថាគណបក្សសង្រ្គោះជាតិបានស្នើសម្រួលពាក្យ «ជួល»ទៅជាពាក្យសុំប្រើប្រាស់ដោយមិនយកថ្លៃ ចំពោះមណ្ឌលកីឡា ឧទ្យានសាធារណៈ និងបន្ថែមពាក្យទីធ្លាសាធារណៈ។ គណបក្សសង្រ្គោះជាតិបានគាំទ្រឲ្យមន្រ្តីរាជការស៊ីវិល និងអាជ្ញាធរដែនដីគ្រប់លំដាប់ថ្នាក់ អាចចូលរួមក្នុងយុទ្ធនាការឃោសនាបន្ទាប់ពីម៉ោងធ្វើការងារ ដោយឡែកចំពោះកងយោធពលខេមរភូមិន្ទ នគរបាលជាតិ និងមន្រ្តីតុលាការ មិនត្រូវបានអនុញ្ញាតចូលរួមយុទ្ធនាការឃោសនាឡើយ។ ប៉ុន្តែគណបក្សប្រជាជនកម្ពុជាចង់ឲ្យមន្រ្តីរាជការទាំងអស់ រួមទាំងកងយោធពលខេមរភូមិន្ទ នគរបាលជាតិ និងមន្រ្តីតុលាការ អាចចូលរួមសកម្មភាពឃោសនាបាន។
កំណត់ហេតុបន្តថាគណបក្សប្រជាជន កម្ពុជាចង់ឲ្យអង្គការមិនមែន រដ្ឋាភិបាលឬសមាគមក្នុងស្រុក អន្តរជាតិ ប្រកាន់ជំហរអព្យាក្រឹតភាព ឥតលម្អៀង ក្នុងពេលអំឡុងពេលបោះឆ្នោត ពេលរាប់សន្លឹកឆ្នោត និងការប្រកាសលទ្ធផល។ ប៉ុន្តែគណបក្សសង្រ្គោះជាតិបានស្នើលុបចោលខ្លឹមសារនៃមាត្រា១៣៧ដែល កំហិតទៅលើសង្គមស៊ីវិលនេះចេញទាំងស្រុង។
លោកនាយករដ្ឋមន្ត្រី ហ៊ុន សែន ក៏បានច្រានចោលការចោទប្រកាន់របស់គណបក្សសង្រ្គោះជាតិថាបានលួចបន្លំសន្លឹកឆ្នោតកាលពីការបោះឆ្នោតខែកក្កដា ឆ្នាំ២០១៣ ដោយលោកបបួលគណបក្សប្រឆាំងស្បថស្បែលើការចោទប្រកាន់នេះ។ លោកបញ្ជាក់ថា«អ្នកឯងនិយាយពីរឿង បន្លំសន្លឹកឆ្នោត ខ្ញុំចង់បបួលពួកហ្នឹង ទៅមុខព្រះអង្គដងកើ ស្បថឱ្យងាប់ទាំងពូជតែម្តង»។
គួររំឮកថាគណបក្សប្រជាជនកម្ពុជា និងគណបក្សសង្រ្គោះជាតិ បានសម្រេចកិច្ចព្រមព្រៀងនយោបាយមួយកាលពីថ្ងៃទី២២ខែកក្កដា ឆ្នាំ២០១៤ ដោយឯកភាពគ្នាក្នុងការកែទម្រង់ការបោះឆ្នោត ដើម្បីធានាថាការបោះឆ្នោតលើកក្រោយអាចទុកចិត្តបាន និងពុំមានការតវ៉ាពីគណបក្សនយោបាយផ្សេងទៀត។
រហូតមកដល់ពេលនេះ ក្រុមការងារវិសោធនកម្មច្បាប់បោះឆ្នោតរបស់គណបក្សប្រជាជនកម្ពុជា និងគណបក្សសង្រ្គោះជាតិ បានសម្រេចកំណត់ហេតុរួមគ្នាមួយ ដោយក្នុងនោះដាក់មាត្រាចំនួន១០ដែលមិនទាន់ឯកភាពគ្នាទៅថ្នាក់ដឹកនាំកំពូលដើម្បីសម្រេច។ ក្រុមការងារគណបក្សទាំង២បានពិភាក្សា១៣៨មាត្រា ហើយចំណុចដែលក្រុមការងារនៃគណបក្សទាំងពីរបានឯកភាពគ្នារក្សាខ្លឹម សារដើមមានចំនួន១១០មាត្រា។ ចំណុចដែលក្រុមការងារនៃគណបក្សទាំង២បានឯកភាពគ្នាកែសម្រួលខ្លឹមសារមានចំនួន១៨មាត្រា ស្មើនឹង៣០ចំណុច និង១០មាត្រា ស្មើនឹង១០ចំណុច មិនទាន់ឯកភាពគ្នានៅឡើយទេ។
ក្រុមការងារនឹងបន្តពិភាក្សាលើជំពូក១០ អំពីទោសបញ្ញត្តិ ជំពូកទី១១អំពីអន្តរប្បញ្ញត្តិ និងជំពូកទី១២អំពីអវសាន្តប្បញ្ញត្តិ។
លោក គួយ ប៊ុនរឿន ប្រធានក្រុមការងារកំណែទម្រង់របស់សង្រ្គោះជាតិ មានប្រសាសន៍ថាក្រុមការងារនឹងពន្លឿនការងារនេះយ៉ាងយូរបំផុតឲ្យហើយ នៅសប្តាហ៍ទី១នៃខែមីនា ឆ្នាំ២០១៥។
ប្រធានគណបក្សសង្រ្គោះជាតិ លោក សម រង្ស៊ី និងលោក ស ខេង គ្រោងនឹងជួបគ្នានៅថ្ងៃសៅរ៍ទី២៨ ចុងខែកុម្ភៈខាងមុខនេះ៕
អានអត្ថបទ៖ គណបក្សទាំង២សម្រេចកំណត់ហេតុកំណែទម្រង់ការបោះឆ្នោតរួមគ្នា ដាក់ទៅថ្នាក់ដឹកនាំសម្រេច
http://vodhotnews.com/27651
Buddhism for Social ( Peace,Freedom,Human Rights,Justice )
No comments:
Post a Comment