Thursday, February 26, 2015

នាយករដ្ឋ​មន្ត្រី​អន់​ចិត្ត​ជាមួយ​មិត្ត​បរទេស រិះ​គន់​លោក

នាយករដ្ឋ​មន្ត្រី​ ហ៊ុន សែន អន់​ចិត្ត​ជាមួយ​មិត្ត​បរទេសដែលបាន រិះ​គន់​ការដឹកនាំនយោបាយរបស់គាត់
***********************
ភ្នំពេញបុស្តិ៍ : លោក​នាយក​រដ្ឋ​មន្ត្រី ហ៊ុន សែន នៅ​ព្រឹក​ថ្ងៃ​ព្រហស្បតិ៍​នេះ បាន​ប្រើ​ប្រាស់​សន្និសីទ​អន្តរជាតិ​ស្តីពី​តំបន់​អាស៊ី​ប៉ាស៊ីហ្វិក ចោទ​ជា​សំនួរ​សួរ​ជា​សាធារណៈ​ទៅកាន់​អតីត​រដ្ឋ​មន្ត្រី​ក្រសួង​ការ​បរទេស​អូស្ត្រាលី និង​ជា​ដៃ​គូរ​​ម្នាក់​នៃ​សន្ធិ​សញ្ញា​ទីក្រុង​ប៉ារីស លោក Gareth Evans ថា ហេតុអ្វី​បាន​ជា​រិះ​គន់​វាយ​ប្រហារ​ធ្ងន់ៗ​មក​លើ់​រូប (ហ៊ុន សែន) ក្នុង​អត្ថបទ​មួយ កាល​ពី​ឆ្នាំ​មុន។
លោក Evans ដែល​មន្ត្រី​ជាន់​ខ្ពស់​គណបក្ស​ប្រជាជន​កម្ពុជា​ធ្លាប់​ហៅ​ថា «ឳពុក​កម្ពុជា» អង្គុយ​ស្តាប់​យ៉ាង​ទើស​ទាល់ នៅ​​លើ​​​​ឆាក ខណៈ​ដែល​លោក​នាយក​រដ្ឋ​មន្ត្រី ហ៊ុន សែន កំពុង​ថ្លែង​សុន្ទរកថា​គន្លឹះ​បើក​សន្និសីទ​អន្តរជាតិ ស្តី​ពី​វឌ្ឍន​ភាព បញ្ហា​ប្រឈម និង​កាលានុវត្ត​ភាព​នៅ​តំបន់​អាស៊ី​ប៉ាស៊ី​ហ្វិក លើក​ទី​១០ ដែល​ធ្វើ​ឡើង​នៅ​ក្នុង​សណ្ជាគារ​សូហ្វីតែល​ ភ្នំពេញ ចំនួន​ពីរ​ថ្ងៃ​ចាប់​ផ្តើម​ពី​ថ្ងៃ​ព្រហស្បតិ៍​នេះ​ទៅ។
លោក​នាយក​រដ្ឋ​មន្ត្រី បាន​បែរ​ខ្នង​និង​សួរ​ទៅលោក Evans នៅ​ចំពោះ​មុខ​អង្គទូត​នានា រួម​ទាំង​អគ្គ​រដ្ឋ​ទូត​អូស្ត្រាលី​ប្រចាំ​កម្ពុជា​លោកស្រី Alison Burrows និង​មន្ត្រី​ពាក់​ព័ន្ធ​នានា​មក​ពី​បណ្តា​ប្រទេស​ផ្សេងៗ ដោយ​លោក​បាន​ចោទ​សួរ​ថា ហេតុ​អ្វី​លោក​ដែល​ជា​អតីត​សម្ព័ន្ធ​មិត្ត​នឹង​គ្នា លែង​ចង់​រាប់​អាន​គ្នា​ជា​មិត្ត​ទៀត។
លោក​ថ្លែង​ថា «ខ្ញុំ​ឆ្ងល់​ថា ហេតុ​អ្វី មិត្ត​របស់​ខ្ញុំ រិះ​គន់​ខ្ញុំ នៅ​ក្នុង​កាសែត​កាល​ពី​ឆ្នាំ​មុន។ ខ្ញុំ​នៅ​ចាំ ពេល​ដែល​យើង​ធ្វើ​ការ​ជាមួយ​គ្នា ដើម្បី​ទប់​ស្កាត់​ការ​វិល​ត្រលប់​មក​វិញ​នៃ​ពួក​ខ្មែរ​ក្រហម និង​ឈាន​ទៅ​សម្រេច​កិច្ច​ព្រម​ព្រៀង​ប៉ារីស»។ «ខ្ញុំ​ចាំ​ថា ជិះ​ឡាន​ជាមួយ​ក្នុង​ទីក្រុង ស៊ីដនី និង​ការ​ចរចា​ដល់​យប់​ជ្រៅ នៅ​ក្នុង​ទីក្រុង ហ្សាកាតា មុន​ទៅ​ដល់​កិច្ច​ព្រម​ព្រៀង ឆ្នាំ​១៩៩១»។
លោក​បាន​សួរ​ថា «យើង​ធ្លាប់​ជា​មិត្ត​ជាមួយ​គ្នា ប៉ុន្តែ​ឥឡូវ លោក​ឯង​លែង​ចង់​ធ្វើ​មិត្ត​ទៀត​ហើយ?» ខ្ញុំ​មិន​សម​រិះ​គន់​លោក​នៅ​ពេល​នេះ​ទេ ដោយ​សារ​តែ​ខ្ញុំ​គិត​រឿង ដែល​ធ្លាប់​ធ្វើ​ការ​ជាមួយ​គ្នា​យូរ​មក​ហើយ»។
ទោះ​បី​ក្រោយ​មក លោក​នាយក​រដ្ឋ​មន្ត្រី​បាន​សម្រួល​អារម្មណ៍​និង​បាន​និយាយ​ថា «ខ្ញុំ​និយាយ​លេង​ទេ» ប៉ុន្តែ​លោក​បាន​បញ្ជាក់​ថា «ពាក្យ​សម្តី​មួយ​ចំនួន ខ្ញុំ​និយាយ​លេង​មែន ក៏​មាន​ខ្លះ​និយាយ​ជា​ការ​ពិត​ដែរ»។
នៅ​ក្នុង​អត្ថបទ​​របស់​លោក​​​មួយ​បែប បញ្ចេញ​ទស្សនៈ ដែល​បាន​ចុះ​ផ្សាយ​លើ​ទំព័រ​កាសែត ភ្នំពេញ ប៉ុស្តិ៍ កាល​ពីថ្ងៃទី ០៧ ​ខែ​​មីនា ​ឆ្នាំ​មុន លោក Evans បាន​និយាយ​ថា «អ្នក​ដឹក​នាំ​នយោបាយ​កម្ពុជា គួរ​តែ​ត្រូវ​ផ្លាស់​ប្តូរ ព្រោះ​មាន​ឈ្មោះ​មិន​ល្អ ត្រូវ​តែ​មាន​ការ​ស៊ើប​អង្កេត និង​ដាក់​ទណ្ឌ​កម្ម» ដោយ​សហគមន៍​អន្តរជាតិ។
លោក​បាន​សរសេរ​ថា « វា​យូរ​ណាស់​ពេក​ហើយ​ដែល​លោក ហ៊ុន សែន និង​សហការី​របស់​គាត់​មិន​ទទួល​ខុស​ត្រូវ​ចំពោះ​អំពើ​ហិង្សា​ការ​រំលោភ​បំពាន​សិទ្ធិ​មនុស្ស អំពើ​ពុករលួយ និង​ប្រព័ន្ធ​ផ្សព្វ​ផ្សាយ និង​ការ​ប្រើ​ល្បិច​បោក​ប្រាស់​ក្នុង​ការ​បោះឆ្នោត។...»
លោកបន្តថា «ខ្ញុំ​ស្គាល់​លោក ហ៊ុន សែន និង​បាន​ធ្វើ​ការងារ​ជាមួយ​គាត់​កាល​ពី​អតីតកាល។ ខ្ញុំ​បាន​តទល់​នឹង​ការ​រិះគន់​ជា​សាធារណៈ​ខ្លាំង​ក្លា​រហូត​មក​ឥឡូវ​នេះ ដោយ​សារ​ខ្ញុំ​គិត​ថា វា​មាន​សង្ឃឹម​សម្រាប់​គាត់ និង​រដ្ឋាភិបាល​របស់​គាត់​ក្នុង​ការ​ឈាន​ទៅ​រក​ភាព​ល្អ​ប្រសើរ។ ប៉ុន្តែ​ឥរិយាបថ​របស់​ពួក​គាត់​ឥឡូវ​នេះ​បាន​លើស​ពី​អ្វី​ដែល​អាច​ទ្រាំ​បាន​ហើយ​វា​ដល់​ពេល​ហើយ​ដែល​មេ​ដឹក​នាំ​នយោបាយ កម្ពុជា គួរ​ត្រូវ​បាន​ស៊ើប​អង្កេត​និង​ដាក់​ទារុណកម្ម​ដោយ​សហគមន៍​អន្តរជាតិ»។
លោក Evans បាន​បដិសេធ​មិន​ធ្វើ​អធិប្បាយ​លម្អិត​លើ​សម្តី​របស់​លោក​នាយក​រដ្ឋ​មន្ត្រី​ហ៊ុន សែន​ ថ្ងៃ​នេះ ដោយ​គ្រាន់​តែ​ថា «ខ្ញុំ​សប្បាយ​ចិត្ត ពេល​ដែល​ដឹង​ថា លោក​នាយក​រដ្ឋ​មន្ត្រី​អាន​អត្ថបទ​របស់​ខ្ញុំ»។



Buddhism for Social ( Peace,Freedom,Human Rights,Justice )

No comments:

Post a Comment