Thursday, February 19, 2015

​អាជ្ញាធរ​កម្ពុជា​ព្រមាន​ចាត់វិធានការ ចំពោះ​លោក អា​ឡិច​នៅពេល​ផុតកំណត់​ទិដ្ឋាការ​​




​អាជ្ញាធរ​កម្ពុជា​ព្រមាន​ចាត់វិធានការ ចំពោះ​លោក អា​ឡិច​នៅពេល​ផុតកំណត់​ទិដ្ឋាការ​​
***************VOD
អាជ្ញាធរ​កម្ពុជា​ព្រមាន​ថា នឹង​ចាត់វិធានការ​តឹងរ៉ឹង​ចំពោះ​លោក អា​ឡិច សកម្មជន​ការពារ​តំបន់​អា​រ៉ែ​ង នៅពេល​ទិដ្ឋាការ​រស់នៅ​កម្ពុជា​ត្រូវ​ផុត​ក​កំណត់​នៅ​ថ្ងៃស្អែក​នេះ ខណៈ​ក្រសួងមហាផ្ទៃ​មិន​ព្រម​បន្ត​ទិដ្ឋាការ​ដល់​ជនជាតិ​អេស្បាញ​រូបនេះ ។​
​អ្នកនាំពាក្យ​ក្រសួង​មហាផ្ទៃ លោក ខៀវ សុភ័គ បាន​ប្រាប់ VOD នៅ​ថ្ងៃ​ទី​១៩ ខែ​កុម្ភៈ ឆ្នាំ​២០១៥​នេះ​ថា អាជ្ញាធរ​ត្រៀម​វិធានការ​ចំពោះ​លោក អា​ឡិច ជា​ស្រេច​ហើយ ប៉ុន្តែ​លោក​មិន​បាន​បញ្ជាក់​ពី​ចំណាត់ការ​ថា​នឹង​ត្រូវ​ធ្វើ​អ្វី​នោះ​ទេ ។

អគ្គនាយក​នៃ​អគ្គនាយកដ្ឋាន​អន្តោប្រវេសន៍ លោក សុខ ផល មានប្រសាសនថា លោក​អា​ឡិច ត្រូវតែ​ចាកចេញ​ពី​ប្រទេស​កម្ពុជា​មួយ​រយៈពេល​សិន ហើយ​បើ​ចង់​រស់នៅ​កម្ពុជា​បន្ត​ទៀត​ត្រូវតែ​រង់ចាំ​ទិដ្ឋាការ​ថ្មី ។ លោកមានប្រសាសន៍ថា «គ្មានអីដែលលំបាកអីទេ ចេញផុតទៅត្រឹមបាងកក មួយយប់ ឬ មួយម៉ោង គាត់ត្រឡប់មកវិញមកគេឲ្យចូល​»។

​សកម្មជន​ការពារ​តំបន់​អា​រ៉ែ​ង លោក អា​ឡិច មានប្រសាសន៍ថា លោក​មិន​ជឿ​លើ​ការអះអាង​របស់​អាជ្ញាធ​រ​កម្ពុជា​ដែល​ថា​ឲ្យចេញ​សិន ហើយ​ចាំ​វិល​មក​វិញ​នៅ​ពេល​ក្រោយ​នោះ​ទេ ។ លោកអាឡិចបញ្ជាក់ថា «នៅប្រទេសកម្ពុជា ឲ្យចាកចេញសិន​ដើម្បីបន្តវីសាវិញ មិនដែលមានទេ ប្រហែលជាអ្នកដែលនិយាយចឹង អត់ទាន់យល់ច្បាប់ខ្លួនផង ហើយដូចខ្ញុំនិយាយខាងដើម បើខ្ញុំចាកចេញពីខ្មែរ គេអត់ឲ្យចូលវិញទេ ចឹងខ្ញុំគោលជំហនៅដដែលទេ ប៉ុន្តបើសិនគេមកចាប់ក៏ខ្ញុំអត់តដៃ ព្រោះយើងមានវប្បធម៌អហិង្សាមួយរយភាគរយ»។

​មន្ត្រីរាជការ ក្រសួង​រ៉ែ និង​ថាមពល ប្រមាណ​១៤០​នាក់​បាន​ផ្តិតមេដៃ​គាំទ្រ​ចំណាត់ការ​របស់​ក្រសួង​មហាផ្ទៃ​ក្នុង ការមិន​ផ្តល់​ទិដ្ឋាការ​ឲ្យ លោក អាឡិក​ហ្សង់​ដ្រូ ហ្គន់​ហ្សា​ឡេស ដេ​វិតសិន​(Alejandro Gonzalez Davidson) ដែល​ជា​សកម្មជន​ការពារ​តំបន់​អា​រ៉ែ​ង ឲ្យ​បន្ត​ស្នាក់នៅ​ក្នុង​ប្រទេស​កម្ពុជា​តទៅទៀត ដោយ​ចាត់ទុក​ថា​សកម្មជន​រូ​ប​នេះ​ជ្រៀតជ្រែក​ការអភិវឌ្ឍ​ទំនប់​វា​រី​អគ្គិសនី ។​

​លោក អា​ឡិច ជា​ជនជាតិ​អេ​ស្ប៉ាញ​ដែល​បាន​មក​រស់នៅ​លើ​ទឹកដី​កម្ពុជា​នេះ​ជាង​១០ ឆ្នាំ​មកហើយ និង​ចេះ​និយាយ​ភាសា​ខ្មែរ​បាន​យ៉ាង​ច្បាស់ ព្រមទាំង​បាន​បង្កើត​សមាគម​ការពារ​ព្រៃឈើ​មួយ​ឈ្មោះ​ជា​មាតា​ធម្មជាតិ ។ សកម្មជន​ការពារ​តំបន់​អា​រ៉ែ​ង លោក អា​ឡិច ត្រូវបាន​ក្រសួង​មហាផ្ទៃ​អះអាងថា ទិដ្ឋាការ​របស់​លោក​នឹង​ត្រូវ​ផុតកំណត់​នៅ​ថ្ងៃទី​២០ ខែ​កុម្ភៈ ស្អែក​នេះ ។

​នៅ​ថ្ងៃ​ទី​១៨ ខែ​កុម្ភៈ ម្សិលមិញ​នេះ អនុប្រធាន​ទី​១​នៃ​រដ្ឋសភា​លោក កឹម សុខា បាន​រក​ព្រះរាជ​អន្តរាគមន៍​ពី​ព្រះមហាក្សត្រ និង​ស្ថាប័ជាតិ​មួយចំនួនទៀត ដើម្បី​ទប់ស្កាត់​កុំឲ្យ​មាន​ការបណ្តេញ​សកម្មជន​ការពារ​បរិស្ថាន​ដ៏​លេចធ្លោរ​ម្នាក់នេះ​ចេញពី​កម្ពុជា ៕

Buddhism for Social ( Peace,Freedom,Human Rights,Justice )

No comments:

Post a Comment