Live2.ទិវាសិទ្ធិមនុស្សអន្តរជាតិ១០ធ្នូ International Human Rights Day

អបអរសាទរ ទិវាសិទ្ធិមនុស្សអន្តរជាតិ១០ធ្នូ១៩៤៨=២០១៨ ខួបលើកទី៧០ឆ្នាំ ! ព្រះសង្ឃ អង្គការ សមាគម សហគមន៍ សហជីព កម្មករ កសិករ រាប់រយនាក់បានជួបជុំគ្នាប្រារព្ធទិវាសិទ្ធិមនុស្សអន្តរជាតិ១០ធ្នូចាប់ពីម៉ោង៨ព្រឹករហូតដល់ម៉ោងជាង១១ព្រឹក នៅទីលានប្រជាធិបតេយ្យថ្មី ជាប់មាត់ទន្លេ គីឡូម៉ែត្រលេខ៦ ផ្លូវជាតិលេខ៥ ខណ្ឌឫស្សីកែវ ដោយមានការ កាន់បដា ពាក្យស្លោកផ្សេងៗ បង្ហោះប៉េងប៉ោង សំដែងមតិ ទាមទារយុត្តិធម៌នៃការគោរពសិទ្ធិមនុស្ស សិទ្ធិការងារ សិទ្ធិសេរីភាពនៃការជួបប្រជុំសំដែងមតិ អានប្រវត្តិនៃការប្រារព្ធទិវាសិទ្ធិមនុស្សនៅកម្ពុជា និងអានខ្លឹមសារនៃសេចក្តីថ្លែងការរួមក្នុងទិវាសិទ្ធិមនុស្សផងដែរ ។ ក្នុងការប្រារព្ធទិវាសិទ្ធិមនុស្សអន្តរជាតិ១០ធ្នូឆ្នាំ២០១៨នេះ គឺមានការរិតត្បិត សិទ្ធិសេរីភាព ពីសំណាក់សមត្ថកិច្ច អាជ្ញាធរក្រុងភ្នំពេញ ដោយមិនអនុញ្ញាតិឲ្យមានការដង្ហែក្បួនចេញពីមុខសួនច្បារមាត់ទន្លេក្បែរវត្តភ្នំមកកាន់ទីលានប្រជាធិបតេយ្យថ្មី តាមការគ្រោងទុកនោះទេ ដោយខាងអាជ្ញាធរក្រុងភ្នំពេញលើកហេតុផលដដែលៗគឺ ការហែរក្បួននាំឲ្យខូចសណ្តាប់ធ្នាប់សាធារណៈ ប៉ះពាល់សន្តិសុខសង្គម ជាដើម ។ ខាងអាជ្ញារក្រុងភ្នំពេញបានប្រើប្រាស់កងកម្លាំងសមត្ថកិច្ចចម្រុះរាប់រយនាក់ដាក់ពង្រាយនិងឡោមព័ទ្ធទីលានប្រជាធិបតេយ្យថ្មីនិងសួនច្បារមាត់ទន្លេក្បែរវត្តភ្នំយ៉ាងច្រើនស្អេកស្កះ ហាក់ដូចជាការគំរាមកំហែង បំបិទសិទ្ធិសេរីភាព នៃសិទ្ធិជួបប្រជុំ សំដែងមតិ ដែលផ្ទុយពីសេចក្តីប្រកាសរបស់ក្រសួងមហាផ្ទៃកន្លងមក ។