Wednesday, September 9, 2015

Hun Sen គំរាមថាបើគណបក្សប្រជាជនចាញ់ឆ្នោតនិងកើតសង្គ្រាមជាមួយប្រទេសជិតខាង

Hun Sen គំរាមដោយប្រើពាក្យថានិងកើតសង្គ្រាមជាមួយប្រទេសជិតខាងបើគណបក្សផ្សេងឈ្នះឆ្នោតឡើងកាន់អំណាចក្រៅពីគណបក្សប្រជាជន ។ http://youtu.be/gWbMDMnHZrc លោកនាយករដ្ឋមន្រ្តី ហ៊ុន សែន កាលពីថ្ងៃអង្គារ បានអះអាងច្បាស់១០០ភាគរយថាប្រទេសកម្ពុជានឹងមានសង្រ្គាម នៅពេលគណបក្សប្រឆាំងឡើងកាន់អំណាច ជំនួសគណបក្សប្រជាជនកម្ពុជា។ លោក ហ៊ុន សែន បានថ្លែងបែបនេះជាសាធារណៈតាមរយៈវីដេអូថតទុករយៈពេលប្រមាណ៣ម៉ោងដែលចាក់ផ្សាយតាមទូរទស្សន៍ជាតិកម្ពុជា(ទ.ទ.ក)កាលពីរសៀលថ្ងៃអង្គារ ដើម្បីបង្ហាញគោលជំហររបស់រដ្ឋាភិបាលក្នុងការពារព្រំដែន។ ក្នុងវីដេអូនោះ លោក ហ៊ុន សែន បានរិះគន់គណបក្សសង្រ្គោះជាតិថាបានយកផែនទីទៅបោកប្រាស់ប្រជាពលរដ្ឋកម្ពុជា។ លោកក៏បានចេញបញ្ជាឲ្យចាប់ខ្លួនភ្លាមៗចំពោះអ្នកនិយាយរឿងផែនទីក្លែងក្លាយ។ លោក ហ៊ុន សែន ក៏បានថ្លែងបញ្ជាក់ជាថ្មីថាបើគណបក្សប្រជាជនកម្ពុជាមិនបានកាន់អំណាច នោះប្រទេសកម្ពុជានឹងមានសង្រ្គាម។ លោកបានបញ្ជាក់ថា៖ ”បើខុសពីគណបក្សប្រជាជន គណបក្សដទៃកាន់អំណាច នឹងមានសង្រ្គាមផ្តាច់ការ។ ខ្ញុំព្រះករុណាខ្ញុំអះអាងថានឹងមានសង្រ្គាម”។ លោកបញ្ជាក់បន្ថែមថា៖ “…នេះហើយជាលទ្ធផលដែលវានឹងមកដល់ នៅពេលគណបក្សប្រឆាំងកាន់អំណាច។ វានឹងមកដល់នៅពេលដែលគណបក្សប្រជាជនមិនកាន់អំណាចតទៅទៀត។ វាច្បាស់នឹងមកដល់។ បក្សដទៃកាន់អំណច ច្បាស់ណាស់វា(សង្រ្គាម)កើត។ ខ្ញុំព្រះករុណាខ្ញុំនិយាយពេញមាត់ មានតែគណបក្សប្រជាជនមួយគត់ ដែលធានាថាគ្មានជម្លោះទល់ដែនជាមួយប្រទេសជិតខាង”។ កាលពីខែឧសភា ឆ្នាំ២០១៥ លោកនាយករដ្ឋមន្រ្តី ហ៊ុន សែននិងប្រធានគណបក្សសង្រ្គោះជាតិ លោក សម រង្ស៊ី បានឯកភាពគ្នាលើការមិនឲ្យប្រើប្រាស់ពាក្យពេចន៍មួយចំនួន ក្នុងនោះមានពាក្យចាប់ដាក់គុក និងសង្គ្រាមកើតឡើងជាដើម ដើម្បីជាប្រយោជន៍នៃវប្បធម៌សន្ទនា។ គណបក្សទាំងពីរបានឯកភាពចៀសវាងឲ្យខាងតែបាននូវការញុះញង់ ការលាបពណ៌ ការប្រើពាក្យអសុរោះ និងការជេរប្រមាថគ្នា ដូចជាករណីប្រើពាក្យអាក្បាលយួនខ្លួនខ្មែរ ពួកកុម្មុយនីស្តផ្តាច់ការ អាយ៉ងយួន អាក្បត់ជាតិ អាលក់ជាតិ អាមេចោរ និងអាកូនចោរ។ ឮគណបក្សទាំងពីរក៏បានឯកភាពលុបបំបាត់ចោលនូវផ្នត់គំនិតនៃការគុំកួន សងសឹកគ្នា ដោយត្រូវបញ្ចប់នយោបាយ«ទឹកឡើងត្រីស៊ីស្រមោច ទឹកហោចស្រមោចស៊ីត្រី» និងលុបបំបាត់ចោលនូវនយោបាយប្រកាន់ពូជសាសន៍ និងនយោបាយជ្រុលនិយម។ អ្នកនាំពាក្យគណបក្សសង្រ្គោះជាតិ លោក យ៉ែម បុញ្ញឫទ្ធិ ធ្លាប់មានប្រសាសន៍ថាប្រសិនបើគណបក្សសង្រ្គោះជាតិឈ្នះការបោះឆ្នោតនៅឆ្នាំ២០១៨ នឹងមិនមានអស្ថិរភាពក្នុងប្រទេសនោះទេ ដោយសារប្រជាជនជាអ្នកផ្តល់អំណាចដល់គណបក្សណាមួយ។ លោកបញ្ជាក់ថា៖”ខ្ញុំមិនគិតដូច្នោះទេ ពីព្រោះស្ថិតទៅលើប្រជាពលរដ្ឋដែលជាអ្នកម្ចាស់អំណាច ម្ចាស់ឆ្នោត នៅពេលដែលលោកប្រគល់ទៅគណបក្សណាមួយ ពេលនោះគាត់នឹងការពារកម្លាំងសំឡេងឆ្នោតរបស់គាត់”។ គួរបញ្ជាក់ថាកន្លងទៅលោកនាយករដ្ឋមន្រ្តីក៏បានព្រមានថាប្រសិនបើមានការផ្លាស់ប្តូរគណបក្សដឹកនាំប្រទេស នោះអាចនឹងមានចលាចល និងសង្រ្គាម ដូចបទពិសោធន៍កាលពីអតីតកាល។ លោកនាយករដ្ឋមន្រ្តី ហ៊ុន សែន បានកាន់អំណាចជានាយករដ្ឋមន្រ្តីអស់រយៈពេល៣០ឆ្នាំមកហើយ។ អង្គការឃ្លាំមើលសិទ្ធិមនុស្សអន្តរជាតិ(Human Rights Watch) បានចាត់ទុកការដឹកនាំ៣០ឆ្នាំរបស់លោក ហ៊ុន សែន ពោរពេញទៅដោយហិង្សា ការគាបសង្កត់និងអំពើពុករលួយ។ គួររំឭកថា កាលពីថ្ងៃទី០១ខែកុម្ភៈ ឆ្នាំ២០១៥ មហាសន្និបាតវិសាមញ្ញរបស់គណបក្សប្រជាជនកម្ពុជាបានសម្រេចបន្ថែមសមាជិកថ្មី៣០៦រូប ដែលក្នុងនោះមានមេទ័ព នគរបាលនិងកងរាជអាវុធហត្ថប្រមាណ៨០រូប។ ថ្មីៗនេះ មេបញ្ជាការរងកងយោធពលខេមរភូមិន្ទនិងជាតំណាងគណៈមេបញ្ជាការឯកភាពសមរភូមិប្រាសាទព្រះវិហារ លោក ជា តារា បានប្រកាសថាកងទ័ពជាមនុស្សរបស់គណបក្សប្រជាជនកម្ពុជា ក្រោមហេតុផលថាលោកនាយករដ្ឋមន្រ្តី ហ៊ុន សែន ជាអ្នកថែរក្សានិងចិញ្ចឹមបីបាច់ពួកគេ៕ "Non-Violence Overcome All Obstacles"

No comments:

Post a Comment