Hun Sen ថាស្រុកខ្មែរគឺឋានសួគ៌សម្រាប់ធ្វើបាតុកម្ម ! តើជាឋានសួគ៌ឬជាឋាននរកសម្រាប់ធ្វើបាតុកម្មនៅក្នុងប្រទេសកម្ពុជា ? បើជាឋានសួគ៌បាតុកម្មពិតដូចសំដីនាយកមន្ត្រីមែនចុះហេតុអីបានជាកងកំលាំងប្រដាប់អាវុធនិងក្រុមជនបាតដៃទី៣ទៅដេញបាញ់ដេញវ៉ៃក្រុមបាតុករ កម្មករ កសិករ អាជីវករ សមាគម សហគមន៍ ព្រះសង្ឃ ប្រជាពលរដ្ឋ អ្នកកាសែតកន្លងមកបណ្តាលឲរបួសនិងស្លាប់ជាបន្តបន្ទាប់កន្លងមកដូច្នេះ ។ បើជាឋានសួគ៌បាតុកម្មមែនចុះហេតុអីបានជារដ្ឋាភិបាលCPPខ្លាចបាតុកម្ម អាជ្ញាធរតែងតែរារាំងហាមឃាត់ទុបស្កាត់ហើយតុលាការចេះតែចោទនិងចាប់បាតុករអហឹង្សាដាក់គុកជាហូរហែរដោយមូលបង្កាច់ចោទប្រកាន់ខូចសណ្តាប់ធ្នាប់សាធារណ:ជាដើម ។ Hun Sen ចោទថាបាតុករមុខអាដែលៗជាក្រុមបាតុករអាជីពស៊ីឈ្នួលធ្វើបាតុកម្ម តើក្នុងលោកនេះមានក្រុមហ៊ុនណាជ្រើសរើសបុគ្គលិកធ្វើបាតុកម្មស្ម័គ្រចិត្តឲគេវ៉ៃបាញ់ទាត់ធាក់ដែរឬទេ ? បើនិយាយពីមុខអាដែលៗគឺក្រុមជនបាតដៃទី៣និងអ្នមានអំនាចកបញ្ជារឲដេញបាញ់ដេញវាយប្រជាពលរដ្ឋឯណោះទេដែលជាមុខដដែលៗ ហើយពួកនោះគឺជាក្រុមស៊ីឈ្នួលយកលុយបានអំនាចពីប្រជាពលរដ្ឋមកដេញវាយដេញបាញ់ប្រជាពលរដ្ឋវិញ ។ ម្យ៉ាងទៀត សូម្បីតែនាយករដ្ឋមន្ត្រីនៅក្នុងប្រទេសកម្ពុជាក៏មុខអាដែលៗជា៣០ឆ្នាំហើយខោអាវមុខមាត់ចិត្តគំនិតដដែលៗអត់មានដោះដូរសោះតែម្តងហើយ ។ គួរបញ្ជាក់ថា នៅក្នុងសង្គមប្រជាធិបតេយ្យ សិទ្ធិបាតុកម្ម សិទ្ធិសំដែងមតិ សិទ្ធិជួបប្រជុំប្រមូលផ្តុំគឺជាសិទ្ធិអាទិភាពនៃសិទ្ធិពលរដ្ឋនិងសិទ្ធិនយោបាយ ៕ រឿងកើតឡើងអាដែលៗ បាតុកម្មអាដែលៗ អ្នកមានអំនាចដដែលៗ តើមានខុសគ្នាត្រង់ណា ???
****************
RFA.លោកនាយករដ្ឋមន្ត្រី ហ៊ុន សែន បានលើកឡើងចំៗថា ប្រទេសកម្ពុជា គឺជាឋានសួគ៌សម្រាប់ធ្វើបាតុកម្ម ហើយអ្នកធ្វើបាតុកម្មនោះ គឺជាក្រុមមនុស្សដដែលៗដែលយកការធ្វើបាតុកម្មជាអាជីវកម្ម។ ប៉ុន្តែអង្គការសង្គមស៊ីវិលលើកឡើងថា មូលហេតុនៃការធ្វើបាតុកម្មនោះ ដោយសារតែមានរឿងអយុត្តិធម៌កើនឡើងក្នុងសង្គមច្រើន។
អ្នកដឹកនាំជាន់ខ្ពស់គណបក្សប្រជាជនកម្ពុជា ដែលកាន់តំណែងក្នុងរដ្ឋាភិបាល បានលើកឡើងថា ការធ្វើបាតុកម្មកន្លងទៅដោយសារតែមានមនុស្សមួយក្រុមស្ដាប់តាមការញុះញង់របស់អង្គការសង្គមស៊ីវិលមួយចំនួន ដើម្បីបង្ហាញការមិនពេញចិត្តចំពោះការដឹកនាំរបស់រាជរដ្ឋាភិបាលកម្ពុជា។
លោកនាយករដ្ឋមន្ត្រី ហ៊ុន សែន មានប្រសាសន៍នៅពិធីសម្ពោធដាក់ឲ្យប្រើប្រាស់សមិទ្ធផលមួយចំនួននៅសង្កាត់ជ្រោយចង្វារ នៅថ្ងៃទី២៣ ខែមីនា ថា ស្រុកខ្មែរជាទីកន្លែងងាយស្រួយបំផុតសម្រាប់អ្នកធ្វើបាតុកម្ម ក្នុងនោះអ្នកធ្វើបាតុកម្មបានទទួលការឧបត្ថម្ភទាំងពីចំណីអាហារ ការដឹកជញ្ជូន និងអ្នកលើកទឹកចិត្តក្រុមបាតុករជាដើម។ ម៉្យាងវិញទៀត អ្នកធ្វើបាតុកម្មច្រើនជាមនុស្សមុខដដែលៗ ជាពិសេសក្រុមតវ៉ាដីធ្លី ស្របពេលដែលដីបច្ចុប្បន្នមានតម្លៃកាន់តែថ្លៃ។
លោក ហ៊ុន សែន៖ «ស្រុកខ្មែរឥឡូវអត់បានទេ! លក់ដីឲ្យគេថ្ងៃហ្នឹង ១០០ដុល្លារមួយម៉ែត្រការ៉េ បើដីឡើងដល់ ៥០០ដុល្លារមួយម៉ែត្រការ៉េ មកធ្វើបាតុកម្មទារលុយថែម។ ញុះពីក្រោយជាប់ អង្គការក្រៅរដ្ឋាភិបាលខូចៗមួយចំនួន ហើយចេញថ្លៃម៉ូតូកង់បីអី ឲ្យតែមក មានក្រុមទទួលខុសត្រូវបាយ ក្រុមទទួលខុសត្រូវទឹក...»។
លោក ហ៊ុន សែន មានប្រសាសន៍បន្ថែមថា អ្នកដែលបញ្ឆេះឲ្យផ្ទុះធ្វើបាតុកម្មនោះ កើតឡើងពីក្រុមអង្គការសង្គមស៊ីវិលមួយចំនួន។ ប៉ុន្តែអង្គការសង្គមស៊ីវិលបានបដិសេធប្រសាសន៍របស់លោកនាយករដ្ឋមន្ត្រីទាំងស្រុង ដោយគេអះអាងថា ការធ្វើបាតុកម្មដោយសារតែប្រទេសកម្ពុជា មានការរំលោភដីធ្លី ការរំលោភសិទ្ធិមនុស្ស និងភាពអយុត្តិធម៌កើនឡើងតាមរយៈគម្រោងផ្ដល់ដីសម្បទានសេដ្ឋកិច្ច។
បន្ថែមលើនេះ អង្គការដែលធ្វើការងារលើបញ្ហាដីធ្លីនៅកម្ពុជា បានលើកឡើងថា ភាពអសកម្មរបស់មន្ត្រីរាជរដ្ឋាភិបាលក្នុងការដោះស្រាយជម្លោះដីធ្លីដែលគ្រប់គ្រងដោយឈ្មួញអ្នកមានអំណាចគឺជាមូលហេតុចម្បងនាំឲ្យមានការតវ៉ា ឬនាំឲ្យមានបាតុកម្មកើតឡើង។
ប្រធានអង្គការសមធម៌កម្ពុជា លោក អៀង វុទ្ធី មានប្រសាសន៍ថា បច្ចុប្បន្នជម្លោះដីធ្លីបានកើតមានឡើងនៅទូទាំងប្រទេសកម្ពុជា។ អង្គការសង្គមស៊ីវិលវិញ ជាអ្នកនាំបញ្ហារបស់ប្រជាពលរដ្ឋទៅភាគីពាក់ព័ន្ធ និងរដ្ឋាភិបាលបានដឹង ដើម្បីរកដំណោះស្រាយ៖ «យើងសុំមិនឯកភាពនូវអ្វីដែលលើកឡើងថា សង្គមស៊ីវិល ជាពិសេសអង្គការធ្វើការលើរឿងដីធ្លីហ្នឹងបំផុសឲ្យពលរដ្ឋតវ៉ា។ សម្រាប់យើង យើងធ្វើការជួយមិនត្រឹមតែប្រជាពលរដ្ឋទេ យើងធ្វើការជួយដល់រដ្ឋាភិបាល។ យើងស្វែងរក ឬប្រមូលបញ្ហាកើតឡើង ហើយផ្ដល់ទៅដល់ភាគីពាក់ព័ន្ធ»។
របាយការណ៍របស់អង្គការសង្គមស៊ីវិលបានរកឃើញថា ផ្ទៃដីកម្ពុជាចំនួនជាង ២លានហិកតារត្រូវបានបែងចែកទៅឲ្យឈ្មួញធំ និងមន្ត្រីអ្នកមានអំណាចនៅក្នុងជួររាជរដ្ឋាភិបាលដែលមានងារជាឯកឧត្ដម និងឧត្ដមសេនីយ៍ដែលបញ្ហានេះ បានបង្កឲ្យមានជម្លោះដីធ្លីកើនឡើងជាបន្តបន្ទាប់។
របាយការណ៍របស់សមាគមអាដហុក (Adhoc) បង្ហាញថា ទំនាស់ដីធ្លីនៅចន្លោះឆ្នាំ២០០០ រហូតដល់ឆ្នាំ២០១៣ បានប៉ះពាល់ប្រជាពលរដ្ឋជិត ៨សែននាក់ ដោយសារការទន្ទ្រានដីធ្លី និងបានបង្ក ឲ្យមានការចាប់ខ្លួនអ្នកតវ៉ាដីធ្លីជាច្រើននាក់ដាក់ក្នុងពន្ធនាគារ និងចំនួនបាតុកម្មតវ៉ាដីធ្លីកើតឡើងប្រមាណ ១០០ដងក្នុងមួយឆ្នាំ៕
http://www.rfa.org/khmer/news/politics/pm-says-cam-is-heaven-for-demonstration-03232015075844.html
Buddhism for Social and Nation ( Peace,Freedom,Human Rights,Social Justice )
No comments:
Post a Comment