ហ៊ុន សែន គំរាមតុលាការខ្មែរក្រហមកុំឲបន្តកាត់ក្តីសំណុំរឿង០០៣,០០៤ ប្រយ័ត្នកើតសង្គ្រាមស៊ីវីល
********************
លោកហ៊ុន សែនប្រកាសប្រឆាំងមិនឲ្យសាលាក្តីខ្មែរក្រហមបន្តសំណុំរឿង០០៣និង០០៤
******************អត្ថបទ.VOA,26,02,2015
លោកនាយករដ្ឋមន្ត្រីខ្មែរ ហ៊ុន សែនបានព្រមានសារជាថ្មីថា ការពង្រីកវិសាលភាពការកាត់ទោសអតីតកម្មាភិបាលជាន់ខ្ពស់ខ្មែរក្រហមអាចនឹងបង្កឲ្យមានការកើតសង្គ្រាមស៊ីវិលនៅកម្ពុជាឡើងវិញ។
ថ្លែងក្នុងសន្និសីទអន្តរជាតិស្តីអំពីខួបលើកទី១០នៃការទទួលខុសត្រូវក្នុងការការពារមនុស្សជាតិ វឌ្ឍនភាព បញ្ហាប្រឈម និងកាលានុវត្តភាពនៅអាស៊ីប៉ាស៊ីហ្វិកក្នុងទីក្រុងភ្នំពេញ លោកហ៊ុន សែនបាននិយាយយោងដល់អស្ថិរភាព ដែលអាចបង្កឡើងដោយការពង្រីកការកាត់ទោសនេះ។
«វិសាលភាពចេះតែពង្រីក។ រឿងនេះត្រូវគិតអំពីតម្លៃសន្តិភាព តម្លៃជីវិតមនុស្ស។ បើសង្គ្រាមកើតឡើងវិញ តើប៉ុន្មាននាក់ទៅដែលត្រូវស្លាប់?»
សេចក្តីអត្ថាធិប្បាយរបស់ប្រមុខរដ្ឋាភិបាលខ្មែរធ្វើឡើងស្របពេលដែលការកាត់ក្តីសំណុំរឿងបន្ថែមគឺសំណុំរឿង០០៣ និង០០៤ហាក់ដូចជាមិនបង្ហាញភាពជឿនលឿននោះទេ។
សំណុំរឿងទាំងពីរមានជនជាប់សង្ស័យ ដែលគេដឹងក្រៅផ្លូវការចំនួនប្រាំនាក់ ដែលសុទ្ធសឹងជាអ្នកទទួលខុសត្រូវជាន់ខ្ពស់នៃរបបខ្មែរក្រហម។ ក្នុងនោះសម្រាប់សំណុំរឿង០០៣មានស៊ូ ម៉េត អតីតមេបញ្ជាការកងទ័ពអាកាសខ្មែរក្រហម និងមាស មុត អតីតមេបញ្ជាការកងទ័ពជើងទឹកខ្មែរក្រហម។ រីឯសំណុំរឿង០០៤ មានឱម អាន ហៅតាអាន អតីតគណៈស្រុកកណ្តាលស្ទឹងនៃតំបន់២៥ ក្រោមការគ្រប់គ្រងរបស់តាម៉ុក ហើយនិងយឹម ទិត្យ ហៅតាទិត្យ អតីតលេខាបក្សស្រុកគីរីវង្ស ខេត្តតាកែវ និងអ្នកស្រីអ៊ឹម ចែម អតីតគណៈស្រុកស្រុកព្រះនេត្រព្រះ។
មនុស្សរាប់សែននាក់ត្រូវគេដឹងថា បានស្លាប់និងត្រូវបានសម្លាប់ក្រោមការគ្រប់គ្រងរបស់ជនសង្ស័យទាំងប្រាំ។
លោកនាយករដ្ឋមន្ត្រីហ៊ុន សែនធ្លាប់បានថ្លែងការណ៍ប្រឆាំងនឹងការកាត់ទោសសំណុំរឿងបន្ថែមទាំងពីរ ដោយលោកលើកហេតុផលពីការភ័យខ្លាចអំពីបញ្ហាអសន្តិសុខ ដែលអាចកើតឡើងដោយសារអតីតកងទ័ពខ្មែររត់ចូលព្រៃតស៊ូប្រដាប់អាវុធ។
ក្រោយពីជំនួបរវាងលោកហ៊ុន សែនជាមួយលោកអគ្គលេខាធិការអង្គការសហប្រជាជាតិកាលពីខែតុលាឆ្នាំ២០១០ លោកហោ ណាំហុង រដ្ឋមន្ត្រីការបរទេស បានប្រកាសថា លោកនាយករដ្ឋមន្ត្រីខ្មែរបានប្រាប់ដល់អង្គការសហប្រជាជាតិ«យ៉ាងច្បាស់»ថា នឹងមិនមានករណីកាត់ទោសអ្នកទទួលខុសត្រូវខ្មែរក្រហមបន្ថែមនោះទៀតនោះទេ។
នៅថ្ងៃនេះ លោកហ៊ុន សែនបានលើកពីភាពផុយស្រួយនៃសង្គ្រាមស៊ីវិលឡើងវិញ។
«អារឿងជីវិតមនុស្ស យើងដកពិសោធន៍ហើយ។ ឥឡូវមនុស្សនៅក្នុងពិភពលោកកំពុងតែស្លាប់ដោយសារតែទង្វើខ្លះរបស់មនុស្សបង្កើតឡើង ហើយក្លាយជាសង្រ្គាមស៊ីវិលនៅប្រទេសនោះ។ តើរឿងទៅជាយ៉ាងម៉េច?»
ដោយសារមានការប្រឆាំងជំទាស់ពីលោកនាយករដ្ឋមន្ត្រីហ៊ុន សែននោះ ភាគីកម្ពុជានៅក្នុងសាលាក្តីខ្មែរក្រហមមិនសហការស៊ើបអង្កេតក្នុងសំណុំរឿងបន្ថែម០០៣និង០០៤នោះទេ ពោលគឺការស៊ើបអង្កេតធ្វើឡើងជាឯកតោភាគីដោយសហចៅក្រមស៊ើបអង្កេតអន្តរជាតិតែប៉ុណ្ណោះ។
លោកឡាស អលសិន (Lars Olsen) មន្ត្រីផ្នែកទំនាក់ទំនងកិច្ចការច្បាប់របស់សាលាក្តីខ្មែរក្រហម បញ្ជាក់ថា ការស៊ើបអង្កេតក្នុងសំណុំរឿងទាំងពីរកំពុងបន្តទៀតនៅឡើយ។ ប៉ុន្តែលោកមិនអាចដឹងបានទេថា តើកិច្ចការស៊ើបអង្កេតនេះនឹងត្រូវបញ្ចប់នៅពេលណានោះ។
នៅថ្ងៃនេះដែរ លោកនាយករដ្ឋមន្ត្រីហ៊ុន សែនក៏បានលើកពីបញ្ហាកង្វះថវិកាដែលសាលាក្តីខ្មែរក្រហមកំពុងប្រឈមនោះដែរ៕
http://m.khmer.voanews.com/a/cambodia-pm-reiterates-his-objection-to-prosecute-more-khmer-rouge-leaders/2660325.html
Buddhism for Social ( Peace,Freedom,Human Rights,Justice )
No comments:
Post a Comment