អាឡិច ត្រូវបានចាប់ខ្លួននិងបញ្ជូនចេញផុតពីកម្ពុជាហើយតាមយន្តហោះThai Airway វេលាម៉ោង៨:៣៥នាទីយប់ 23,02,2015 អមដោយប៉ូលីស២នាក់ទៅបឹងកក ។ មុនពេលចាកចេញ អាឡិច បានផ្តាំផ្ញើឲខ្មែរគ្រប់គ្នាការពារព្រៃឈើនៅតំបន់អារ៉ែងនិងចាំជួបគ្នាតាមរយ:Internet.Facebook ជាដើម
***********អត្ថបទVOD
សកម្មជនតំបន់អារ៉ែង លោក អាឡិចហ្សង់ដ្រូ ហ្គន់សាឡេស ដេវិតសិន(Alejandro Gonzalez Davidson) ដែលជាជនជាតិអេស្ប៉ាញ ត្រូវបានបញ្ជូនទៅប្រទេសកំណើតខ្លួនវិញហើយនៅយប់វេលាម៉ោង៨និង៣៥នាទីនេះ។
លោកអាឡិចត្រូវបានចាប់ខ្លួននៅភោជនីយដ្ឋានមួយក្បែរផ្សាររាត្រី រាជធានីភ្នំពេញ នៅថ្ងៃចន្ទនេះ វេលាម៉ោងជាង១រសៀល ដោយត្រូវបានបញ្ជូនទៅអគ្គនាយកដ្ឋានអន្តោប្រវេសន៍។
អង្គការលីកាដូឲ្យដឹងថាលោកបានធ្វើដំណើរតាមជើងហោះហើររបស់ថៃ(Thai Airways)ជើងយន្តហោះឈ្មោះTG585 ឆ្ពោះទៅកាន់ទីក្រុងបាងកក ប្រទេសថៃ ហើយលោកនឹងធ្វើដំណើរបន្តតាមជើងហោះហើរThai Airways លេខTG948 នៅម៉ោង១២និង១០នាទីអាធ្រាត្រយប់នេះ ឆ្ពោះទៅកាន់ទីក្រុងMadridនៃប្រទេសអេស្ប៉ាញ។
លោក ម៉េង ហេង អ្នកសម្របសម្រួលមាតាធម្មជាតិ មានប្រសាសន៍ថាលោកបានជជែកជាមួយលោកអាឡិចតាមទូរស័ព្ទថាមន្រ្តីអន្តោប្រវេសន៍កម្ពុជា២នាក់បានទៅជាមួយអាឡិច ដោយខ្លាចលោកអាឡិចមិនព្រមចាកចេញពីប្រទេសថៃ។ លោកបន្តថាលោកអាឡិចបានផ្តាំផ្ញើឲ្យការពារតំបន់អារ៉ែង និងថាលោកនឹងប្រើប្រាស់ប្រព័ន្ធអ៊ិនធើណែត ក្នុងការផ្តល់ជាគំនិតការពារតំបន់អារ៉ែង។
អ្នកគាំទ្រប្រមាណជា១០០នាក់ បានរង់ចាំនៅខាងមុខអគ្គនាយកដ្ឋានអន្តោប្រវេសន៍ តាំងពីរសៀលថ្ងៃនេះ ដើម្បីរង់ចាំដំណឹងនៃការបញ្ជូនលោកអាឡិចទៅប្រទេសកំណើតវិញ។
អ្នកនាំពាក្យក្រសួងមហាផ្ទៃ លោក ខៀវ សុភ័គ ប្រាប់VODក្រោយពីការចាប់ខ្លួនលោកអាឡិចថាអាជ្ញាធរកម្ពុជាបានប្រើប្រាស់វិធានការត្រជាក់អស់ពីសមត្ថភាព ដើម្បីឲ្យលោកអាឡិច ចាកចេញពីកម្ពុជាមួយរយៈសិន ប៉ុន្តែលោកថាវិធីសាស្ដ្រនេះនៅតែមិនទទួលបានទទួលជោគជ័យ។ លោកបន្ដថាបើវិធីនេះអស់ជម្រើស គឺមានតែប្រើច្បាប់ខ្មែរតែម្ដង ដើម្បីបណ្ដេញចេញ ហើយអ្នកដែលត្រូវបណ្ដេញចេញនឹងត្រូវបានចាត់ចូលក្នុងបញ្ជីខ្មៅ ហើយនឹងមិនអាចអនុញ្ញាតឲ្យចូលក្នុងប្រទេសកម្ពុជាវិញឡើយ។ លោក ខៀវ សុភ័គ មានប្រសាសន៍ថា«យើងបានប្រើប្រាស់អស់ហើយវិធានការតាមការត្រជាក់ វិធានការត្រជាក់នោះគឺថាយើងបានប្រាប់គាត់ឲ្យចេញទៅម្តងហើយ ទៅហើយមកវិញមក គាត់និយាយមែនទែនទៅគាត់ប្រហែលជាស្ដាប់ខ្មែរមិនបាន ក្រែងលោគាត់ជាជនជាតិបរទេសស្ដាប់គ្នាមិនបានអញ្ចឹងទៅ យើងក៏សុំឲ្យទូតអេស្ប៉ាញនិយាយអេស្ប៉ាញជាមួយគាត់ ភាសាអេស្ប៉ាញជាភាសាកំណើតរបស់គាត់ ទូតក៏ប្រាប់ដែរ អាឡិចអើយចេញទៅ ជាភាសាអេស្ប៉ាញនោះណា ហើយគាត់នៅតែស្ដាប់ភាសាអេស្ប៉ាញមិនបានទៀត ដល់អញ្ចឹងមានតែធ្វើច្បាប់កម្ពុជា។ យើងមិនចាំអីឈឺក្បាលជាមួយមនុស្សម្នាក់នោះទេ តាមច្បាប់នេះបណ្ដេញចេញហើយចូលក្នុងបញ្ជីខ្មៅ ចូលមកកម្ពុជាវិញលែងបាន»។
ការចាប់ខ្លួនសកម្មជនរូបនេះ ត្រូវបានធ្វើឡើងបន្ទាប់ពីលោកនាយករដ្ឋមន្រ្តី ហ៊ុន សែន នៅថ្ងៃចន្ទនេះ ប្រតិកម្មនឹងអ្នករិះគន់រដ្ឋាភិបាលដែលមិនបានពន្យារទិដ្ឋាការដល់សកម្មជនការពារព្រៃឈើនៅតំបន់អារ៉ែង លោក លោក អាឡិច ឲ្យបន្តរស់នៅប្រទេសកម្ពុជាបន្តទៀត។ លោកបញ្ជាក់ថា« គេសុខចិត្តឲ្យនៅរហូតដល់អស់ទិដ្ឋាការ។ អញ្ចឹងយើងចេញទៅសិនទៅ រួចហើយចាំសុំត្រឡប់មកវិញ វាទាស់ខុសអី។ ចាំបាចប់ង្កើតស្ថានភាពនេះ(ឲ្យកាន់តែអាក្រក់)។ តែគេបណ្តេញចេញហើយ វាត្រូវចូលក្នុងបញ្ជីខ្មៅ។ វាចប់ហើយ។ អាហ្នឹងហើយគេថាចង់ជ្រុល…»។
លោក អាឡិច ជាជនជាតិអេស្ប៉ាញដែលបានមករស់នៅលើទឹកដីកម្ពុជានេះជាង១០ឆ្នាំមកហើយ និងចេះនិយាយភាសាខ្មែរបានយ៉ាងច្បាស់លាស់ ព្រមទាំងបានបង្កើតសមាគមការពារព្រៃឈើមួយឈ្មោះថា មាតាធម្មជាតិ ដែលមានសមាជិកភាគច្រើនជាជនជាតិដើមភាគតិចនៅតំបន់អារ៉ែង។ ទិដ្ឋាការរបស់លោកអាឡិច បានផុតកំណត់កាលពីថ្ងៃទី២០ខែកុម្ភៈ ឆ្នាំ២០១៥៕
http://vodhotnews.com/27592
Buddhism for Social ( Peace,Freedom,Human Rights,Justice )
No comments:
Post a Comment